ກັມມາທິການການຕ່າງປະເທດ

 

ພາຣະບົດບາດ, ສິດ ແລະ ໜ້າທີ່ ຂອງກັມມາທິການ ການຕ່າງປະເທດ 

        ກັມມາທິການ ການຕ່າງປະເທດ ມີພາຣະບົດບາດ ໃນການຄຸ້ມ ຄອງບໍລິຫານ ວຽກງານການພົວພັນ ແລະ ຮ່ວມມືກັບຕ່າງປະເທດ ກ່ຽວ ກັບວຽກງານ ພຣະພຸດທະສາສະໜາ ແລະ ສາສະໜາອື່ນ ລວມທັງວຽກ ງານອື່ນທີ່ກ່ຽວຂ້ອງ ຕາມຂອບເຂດຄວາມຮັບຜິດຊອບຂອງຕົນ. 

        ສໍາລັບກັມມາທິການ ການຕ່າງປະເທດ ຂອງສູນກາງອົງການ ພຸດທະສາສະໜາສັມພັນ ແຫ່ງ ສປປ ລາວ ຂຽນເປັນຕົວອັກສອນຫຍໍ້ ວ່າ “ກຕປ”, ສ່ວນກັມມາທິການ ການຕ່າງປະເທດ ຂອງອົງການພຸດທະ ສາສະໜາສັມພັນລາວ ແຂວງ, ນະຄອນຫຼວງ ຂຽນເປັນຕົວອັກສອນຫຍໍ້ ວ່າ “ກຕປ”. 

        ກັມມາທິການ ການຕ່າງປະເທດ ຂອງສູນກາງອົງການພຸດທະ ສາສະໜາສັມພັນ ແຫ່ງ ສປປ ລາວ, ອົງການພຸດທະສາສະໜາສັມພັນ ລາວ ແຂວງ, ນະຄອນຫຼວງ ມີ ສິດ ແລະໜ້າທີ່ ຕາມຂອບເຂດຄວາມ ຮັບຜິດຊອບຂອງຕົນ ດັ່ງນີ້: 

1. ຮັບຜິດຊອບບໍລິຫານລວມ ໃນທຸກວຽກງານຂອງ ກັມມາທິການ; 

2. ສ້າງຂໍ້ກໍານົດ, ກົດລະບຽບ, ມະຕິ, ຂໍ້ຕົກລົງ ແລະ ຄໍາສັ່ງອື່ນ ກ່ຽວກັບການຕ່າງປະເທດ ເປັນຕົ້ນ ການເຂົ້າຮ່ວມປະຊຸມ, ເຜີຍແຜ່, ຝຶກອົບຮົມ, ໄປສຶກສາ, ຢ້ຽມຢາມ ແລະ ການເຄື່ອນໄຫວອື່ນທີ່ກ່ຽວຂ້ອງ ຢູ່ຕ່າງປະເທດ ໂດຍມີການປະສານສົມທົບກັບກະຊວງ, ອົງການທຽບເທົ່າກະຊວງ, ພະແນກການ ແລະ ພາກສ່ວນທີ່ກ່ຽວຂ້ອງ; 

3. ສ້າງ ພຣະສະມະນະທູດ ໂດຍຮັບປະກັນ ທັງປະຣິມານ ແລະ ຄຸນນະພາບ ເພື່ອໄປເຜີຍແຜ່ວຽກງານພຣະພຸດທະສາສະໜາ ຢູ່ຕ່າງປະເທດ ຕາມໂອກາດ ແລະ ຄວາມເໝາະສົມ; 

4. ສ້າງຕັ້ງໜ່ວຍງານພຣະສະມະນະທູດ ເພື່ອທໍາໜ້າທີ່ໃນການນໍາ ເອົາຫຼັກສີລທັມ ຂອງພຣະພຸດທະສາສະໜາ ຕະຫຼອດເຖິງ ຮີດຄອງປະເພນີ, ວັດທະນະທັມ ອັນດີງາມຂອງລາວ ໄປເຜີຍແຜ່ຢູ່ຕ່າງປະເທດ; 

5. ຄົ້ນຄວ້າບຸກຄະລາກອນສົງ ທີ່ມີຄຸນສົມບັດ, ຄວາມຮູ້ຄວາມ ສາມາດ ດ້ານພຣະທັມມະວິນັຍ ແລະ ຮີດຄອງປະເພນີອັນດີງາມ ຂອງຊາດ ແລ້ວນໍາສະເໜີຄະນະປະທານ ສູນກາງອົງການພຸດທະ ສາສະໜາສັມພັນ ແຫ່ງ ສປປ ລາວ, ອົງການພຸດທະສາສະໜາ ສັມພັນລາວ ແຂວງ, ນະຄອນຫຼວງ, ກະຊວງ ອົງການທຽບເທົ່າ ກະຊວງ, ພະແນກການ ແລະ ທີ່ກ່ຽວຂ້ອງ ເພື່ອແຕ່ງຕັ້ງໄປ ເຜີຍແຜ່ພຣະພຸດທະສາສະໜາ ຢູ່ຕ່າງປະເທດ; 

6. ຄົ້ນຄວ້າ ແລະ ສ້າງຂໍ້ຕົກລົງ ຫຼື ສັນຍາຮ່ວມມືກັບຕ່າງປະເທດ, ພາກພື້ນ ແລະ ສາກົນ ທີ່ກ່ຽວຂ້ອງ ເພື່ອແລກປ່ຽນການສຶກສາ ສົງ, ເຜີຍແຜ່ສີລະທັມ, ຮີດຄອງປະເພນີ ແລະ ວັດທະນະທໍາ.

ຄະນະບໍລິຫານກັມມາທິການ
ການຕ່າງປະເທດ ສະໄໝທີ8 ປະກອບດ້ວຍ:

1. ພຣະອາຈານ ປອ. ດໍາຣົງ ພິມມະຈັກ
ຫົວໜ້າກັມມາທິການ

2.  ພຣະອາຈານ ປອ. ຫົງສາ ບໍຣິບູນ
ຮອງຫົວໜ້າຫົວໜ້າກັມມາທິການ
ຮັບຜິດຊອບຝ່າຍ​ບໍລິຫານ ແລະ ຫ້ອງການ

3.  ພຣະອາຈານ ປທ. ພູຄໍາ ແກ້ວປະທຸມ 
ຮອງຫົວໜ້າກັມມາທິການ ຮັບຜິດຊອບຝ່າຍວິຊາການ